فكر تايه

 #فكر_تايه

فكر تايه وشباب طول عمره غايب في واقع اليم ومستقبل غير سليم جيل بينشئ بعد جيل واحنا ما زلنا تايهين ..تايهيين في وطن كله اعلام مطبلاتي وشوية مأجورين حكومة ناسيه الضعيف والفقير والغني بيتفرشله الأرض سجاد وبوكيه ورد وكمان حصانه تحميه تعليم وصحة لل يدفع أو معاه كارنيه من سيادة الوزير ابن قاضي أو ضابط أو صوت ابوه مسموع عند المسؤولين وانت يا فقير معلش استحمل واصبر ده حاله البلد ولازم نكون اد التحدي ونعدي من عنق الزجاجة مش انت مصري و وطني برضو ولا انت خاين وعميل

مواصلات زحمة والكل راكب ع بعضه معلش ما هو العيب فيكم برضو والسبب ليلة الخميس مش تراعو برضو قوانين الصحة وتنظيم الأسرة ولا انتو مش هاممكم النظام ولا توعيه ولا عندكم مسؤلية في جيل بعدكم هيدمر ومش هيلقي صحة ولا تعليم ولا غذاء يكفيه

جيل بعدنا ازاي واحنا اللي عايشين مش متوفر لينا غير سكر وجو الحيطة عايشين اتولدنا لقينا ابهاتنا بتحمسنا للمستقبل اتعلم اتنور ثقف نفسك الشاب المتعلم مستقبله احلي وظيفة مضمونة وحياة كريمة وراتب من الحكومة وامتيازات لك محفوظة ولما تكبر تلقي معاش ونهاية خدمة كبيرة تجوز عيالك وتقضي منها بقيت حياتك ، مجرد حلم اب مكنش يعرف أن بكره آمر من اليوم وان تخطيطه هيروح مع الريح ومش هيبقي منه غير ابن فكره تايه وأبسط حقوقه أن يعيش في وطنه جنب زوجته وأولاده وظل بسيط من حيطة قايمة واخر الليل ينام نومة هنية مش مهم بكره شكله ايه ، المهم أنه يعيش ، يعيش في بيئة آمنة مش طفل مخطوف وعيله تايه ، تجار بشر وأعضاء للبيع لل يدفع أصل الحياة حرام للفقير يعيش ، شرطة حكومة مباحث معلش اصل مش سامعينك بعد 24 ساعة يا حضرت تعال بلغ عندنا قواضي اهم منك حماية نظام واللي يتكلم في السياسة والخونة اللي بيتربصو بالبلد امال السجن اتعمل لمين ، يعيش في مستوي صحة وعلاج من الدولة مش احنا برضو مواطنين ولا نفقة الدولة اتعملت للممثلين اصلهم قدمو لمصر كتير شوية اغاني وفن هابطين قبضو ثمنهم من سنين عاشو واتمتعو ولما تعبو وخلصو فلوسهم علي السهر والمنكر والحريم .. معلش أصله مريض ومحتاج يسافر بلاد بره يتعالج علي نفقة الدولة أصله ياما قدم لبلده كتير

انت ..مالك بتشتكي من ايه ...يا راجل من غير ما تقول بلاش تدلع اغليلك شوية نعناع وكوبابة ليمون وانت هتبقي زي الحديد ...يا. دكتور اصل انا بش.... قوم يا حج روح علشان نشوف اللي بعدك الصف طويل منقدرش نسمع كل مريض . يعيش في مستوي تعليم يأهله لبكره ممكن يكون نبغة أو يطور من حياته أو يفيد مجتمعه

صح ونديله منحة دراسة كمان ونخلي التعليم بالمجان اهو ده اللي ناقص اصلك فاكر نفسك من الخوارق وهتعمل بحث علمي ونسجلك براءة اختراع كفاية انك معاك مؤهل متوسط يادوب تعرف تكتب اسمك وتستدل علي العنوان ولو شديت حيلك شوية هتبقي جامعي علشان تسافر وتتغرب اصل للاسف ملكش مكان . يعيش في عدل والكل ع كفة الميزان غلط تتحاسب انت في دولة دستور وقانون ، الأدلة والأوراق موجودة إذا يا براءة يا ام تدان لا في محسوبية ولا سلطة رابعة ولا جهة سيادية تتحكم في القرار . ده ميزان عدل ودستور وحكم الجميع هنا سواسية ، بس مقولتليش فين دفاعك الجلسة ابتدأت ومن الواضح انك مدان بالرغم أنه هو المدعي ورفع قضية ضد الظلم وأصر أنه ع حق وأن القضاء شامخ زي ما بنسمع في الأفلام ونسي أن الواقع مختلف تمام اتحكم عليه بمؤبد أنه اتطاول وفكر أنه له حق وأنه مظلوم ولجأ للبشر علي أنه ياخد حق ولكن بقي ضحية ومترين في مترين وباب حديد وشراع ضوء من غير شمس وزيارة من أولاده كلها انكسار

مسكين كان فاكر نفسه أنه ع حق .

فكر تايه وعمرك ما هترسي علي الارض خليك في السما لان مكانك للاسف مش هنا خليك طير وابنيلك عش واوعا تظهر علي غصن فتصيبك رصاصة ويكون مكانك تحت الارض

فكر تايه وشباب طول عمره ضايع

محمد عاشور 2020